CORPUS BIBLIORUM ÆTATIS REFORMATIONIS
Froschauer-Bibel  (Zürich 1531)  Mk 1

Textübersicht    Version 1    Version 2    Version 3    Version 4

Die gantze Bibel ‖ der vrsprünglichen Ebraischen ‖ vnd Griechischen waarheyt ‖ nach/ auffs aller treüwli= ‖ chest verteütschet.

Getruckt zů Zürich bey Christoffel ‖ Froschouer/ im Jar als man zalt ‖ M. D. XXXI.

^[1] DJsz ist der an= ‖ fang des Euange= ‖ lij von Jesu Chri= ‖ sto dem sun Got= ‖ tes/ ^[2] als geschriben ist ‖ in den Propheten: ‖ Sihe/ ich send mei= ‖ nen botten vor dir ‖ här/ der da bereyte deinen wäg vor dir. ^[3] Es ‖ ist ein rüffende stimm in der wüste/ bereytend ‖ den wäg des Herren/ machend seine fůßpfäd ‖ richtig.

^[4] Joannes der was in der wüste/ vnd tauf= ‖ fet/ vnd prediget den tauff der besserung zur ‖ vergebung der sünden. ^[5] Vnd es gieng zů jm ‖ hinauß das gantz Jüdisch land/ vnd die von ‖ Jerusalem/ vnd liessend sich alle von jm töuf= ‖ fen in dem Jordan/ vnd bekantend jre sünd.

^[6] Joannes aber was bekleydet mit kameel= ‖ haaren/ vnnd mit einem lideren gürtel vmb ‖ sein lende/ vnd aß höuwschrecken vnd wild ‖ honig/ ^[7] vnd prediget/ vnd sprach: Es kumpt ‖ einer nach mir/ der ist stercker dann ich/ dem ‖ ich nit gnůgsam bin das ich mich vor jm bu= ‖ cke/ vnd die riemen seiner schůch auflöse. ^[8] Jch ‖ tauff euch mit dem wasser/ aber er wirt euch ‖ tauffen mit dem heyligen geyst.

^[12] Vnd bald treib jn der geyst in die wüste/ ‖ ^[13] vnd was in der wüste viertzig tag/ vnd ward ‖ versůcht von dem Satan/ vnd was bey den ‖ thieren. Vnd die engel dienetend jm.

^[14] Nachdem aber Joannes gefangen was/ ‖ kam Jesus in Galilea/ vnnd prediget das ‖ Euangelion vom reych Gottes/ ^[15] vnd sprach: ‖ Die zeyt ist erfüllt/ vnd das reych Gottes ist ‖ nach herzů kommen/ besserend euch vnd glau= ‖ bend dem Euangelio.

^[16] Do er aber an dem Galileischen meer ‖ gieng/ sach er Simon vnd Andream seinen ‖ brůder/ das sy jre netz ins meer wurffend/ ‖ dann sy warend fischer. ^[17] Vnd Jesus sprach ‖ zů jnen: Volgend mir nach/ ich wil euch zů ‖ menschenfischeren machen. ^[18] Vnd von stund= ‖ an verliessend sy jre netz/ vnnd volgtend jm ‖ nach.

^[19] Vnd do er von dannen ein wenig fürbaß ‖ gieng/ sach er Jacoben den sun Zebedei/ vnd ‖ Joannen seinen brůder/ do sy jre netz im schiff ‖ zůsamen bůtztend/ vnnd bald růfft er jnen. ‖ ^[20] Vnnd sy liessend jren vatter Zebedeon im ‖ schiff mit den taglöneren/ vnd volgtend jm ‖ nach.

^[21] Vnd sy giengend gen Capernaum/ vnd ‖ bald an den Sabbathen gieng er in die Schů= ‖ len vnnd leeret. ^[22] Vnnd sy entsatztend sich ab ‖ seiner leer: dann er leeret gwaltiglich/ vnnd ‖ nit wie die gschrifftglerten.

^[29] Vnnd sy giengend auß der schůl/ vnnd ‖ kamend bald in das hauß Simonis vnnd ‖ Andreas/ mit Jacoben vnd Johanne. ^[30] Vnd ‖ die schwiger Simonis lag/ vnnd hatt das ‖ feber/ vnnd von stundan sagtend sy jm von ‖ jr. ^[31] Vnd er tratt zů jr/ vnd richtet sy auf/ vnd ‖ hielt sy bey der hand. Vnnd das feber ver= ‖ ließ sy von stundan. Vnd sy dienet jnen.

^[32] Am abent aber/ do die Sonn vndergan= ‖ gen was/ brachtend sy zů jm allerley kran= ‖ cken vnd besäßnen/ ^[33] vnd die gantz statt ver= ‖ samlet sich vor der thür. ^[34] Vnnd er halff vil ‖ kranckenn mit mancherley suchten beladen/ ‖ vnd treib vil teüfel auß/ vnd ließ die teüfel nit ‖ reden/ dann sy kantend jn.

^[35] Vnd des morgens vor tag stůnd er auf/ ‖ vnnd gieng hinauß. Vnnd Jesus gieng in ‖ ein eynöde/ vnnd bättet daselbst. ^[36] Vnd Pe= ‖ trus mit denen die mit jm warend/ eyletend ‖ jm nach. ^[37] Vnnd do sy jnn fundend/ sprach= ‖ end sy zů jm: Jederman sůcht dich. ^[38] Vnd er ‖ sprach zů jnen: Lassend vns in die nächsten ‖ stett gon/ das ich daselbst auch predige: dann ‖ darzů bin ich kommen. ^[39] Vnnd er prediget in ‖ jren schůlen/ im gantzen Galilea/ vnd treyb ‖ die teüfel auß.

^[40] Vnd es kam zů jm ein aussetziger/ der batt ‖ jnn/ vnd kneüwet vor jm/ vnd sprach zů jm: ‖ Wilt du/ so magst du mich wol reynigenn. ‖ ^[41] Vnnd es erbarmet Jesum/ vnnd strackt die ‖ hand auß/ vnd růrt jnn an/ vnd sprach: Jch ‖ wils thůn/ biß reyn. ^[42] Vnd als er also sprach/ ‖ gieng von jm von stundan der aussatz/ vnd ‖ ward reyn. ^[43] Vnd Jesus verbot jm mit tröu= ‖ wen/ vnnd treyb jnn von stundan von jm/ ‖ ^[44] vnd sprach zů jm: Sich zů/ das du nieman ‖ nichts sagest/ sunder gang hin/ vnd zeyg dich ‖ dem priester/ vnd opfer für dein reynigung ‖ was Moses gebotten hat/ zur zügnuß über ‖ sy. ^[45] Er aber/ do er hinauß kam/ hůb an träf= ‖ fenlich außzekünden vnd lautprecht zemachen ‖ die gschicht/ also/ das er hinfür nit mer kondt ‖ offenlich in die statt gon/ sunder er was da ‖ aussen in den eynödinen/ dann sy kamend zů ‖ jm von allen enden.

^[1] VNd er gieng über etlich tag wi= ‖ derumb gen Capernaum/ vnd ‖ es ward lautprecht das er im ‖ hauß was. Vnd von stundan ‖ versamlet sich die gantz menge/ ‖ also/ ...